Таңалагеуімде соғылған дабыл қалалықтарды біраз әбігерге салды. Дүрлігудің жөні жоқ. Бұл- «Қыс-2012» командалық оқу-жаттығу жиындарының басталғандығын білдіретін белгі болатын. Командалық-штабтық жиын екі күнге созылады. Қыс қаһарына мінбей жатып, еліміздің шығысы қар құрсауында жатыр. Жолаушы толы автобус жолда қалып, әбігерге түсіп жатқанда, төтенше жағдайлар министрі Божко мырза Атырауда жүр. Бүгін ел аумағында «Қыс-2012» командалық-штабтық оқу-жаттығу жиындары басталды. Бас штаб биыл Атырауда орналасқан. Таңғы сағат жетіде дабыл соғылды. Дереу облыстық ТЖ және АҚ қызметтері, аумақтық бөлімшелерінің ТЖД-нің жеке құрамы, облыстың ТЖ жөніндегі комиссиясы хабардар етіліп, аяғынан тік тұрды. Облыс әкімінің орынбасары Марат Тағымовтың басшылығымен жиын өтті. Ауа райын болжау орталығы биылғы қыс жайлы болады деп отыр. Алайда, «апаттың айтып келмейтінін» естен шығармау керек. Барлық жедел арнайы қызметтер табиғат күрт мінез танытса, сақадай саймыз дейді. Мысалы, тұтас бір ауыл қар құрсауында қалса, байланысқа арнайы топ жауап береді. Бүгін комиссияға мәлімдеме жасаған «Қазақтелеком» мамандары, 4 шақырымға дейін арнайы тартылған байланыс желісі арқылы телефонмен хабарласуға болады.Ал айшылық алыс жерлерден сымсыз байланыс арқылы хабар аламыз дейді. Қар басқан ауылдағы тұрғындар ас-судан да таршылық көрмейді. Дала асханасы жасақталып, бір мезетте 300-ден 700-ге дейін адам тамақтандырылады. Оқу-жаттығу жиындары кезінде төтенше жағдайлар қызметінің дайындығын бақылау мақсатында бірнеше тактикалық жаттығулар жүргізілді. Кірпіштіде ауа температурасы күрт төмендеп, қар көшкіні болып, елді мекендегі Солтүстік көшесінде кешенді трансформаторлық бекеттің желілері ажырады. Мамандар желілерді мұз басу жағдайында туындаған ауа электр тасымалы желісінің апаттық ажырауын дер кезінде қалыпқа келтіріп, ақауды жойды. Облыста өткізіліп жатқан шараларды үйлестіру үшін 27 жедел штаб құрылды. Оның 1-уі қалада, 12-сі аудан орталықтарында және 14-ті облыстық қызметтерде орналасқан.