Қыркүйекте жаңа неке қию сарайы ашылады
 | Қыркүйек айында қалада зәулім неке сарайы ашылады. Сәңкібай батыр даңғылының бойында орналасқан зәулім ғимараттың ішінде екі салтанат залы мен бөлек фуршет залы бар. Жаңа ғимаратта күніне 50 жұптың некесі тіркеледі. Ал халық көп шоғырланған 12 мөлтек аудандағы "Ертөстік" және "Еркемай" балабақшалары бүлдіршіндерді осы айда қабылдауы тиіс. Медициналық нысандар да назардан тыс қалып жатқан жоқ. Жаңақоныс ауылында 300 орындық көп салалы аурухана, 12 ықшам ауданда 500 орындық емхананың құрылысы жүріп жатыр. Пригородный-2 елді мекенінде күніне 30 адамды қабылдай алатын ауылдық медициналық бекеттің құрылысы аяқталуға жақын. Келесі жылы осындай дәрігерлік амбулаториялар Оңтүстік-батыс ауданында, Қызылжар, Жаңақоныс, Благодарный, Қурайлы және Заречный-3 елді мекендерінде салынады. Қазір облыстық жедел жәрдем бекеті ғимаратының жобалық-сметалық құжаттары әзірленуде. Батыс-2 ауданында 50 метрлік бассейннің құрылысы басталды. Мұз сарайының жобасы жасалуда. Қыркүйектің біріне дейін қалада 27 спорт алаңқайы пайдалануға беріледі. Көлік инфрақұрылымын реттеу үшін Әз-Наурыз көшесінде төртжолақты жол айырығының құрылысы басталды. Жобаның құны - 4,3 миллиард теңге. Ерхан Омаровтың айтуынша, мердігер мекеме құрылысқа соңғы үлгідегі техниканы пайдаланбақшы. Дыбыссыз техникалар жақын үйлердің тұрғындарына кедергі келтірмеуі тиіс. Ал көліктер жаңа жол айырығымен келесі жылы қатынайтын болады. Билік 312-атқыштар дивизиясы даңғылында орналасқан жалғыз үш қабатты үйдің мәселесін шешкен. Тұрғын үйге кәріз жүйесін тарту "СНПС Ақтөбемұнайгаз" компаниясына жүктелді. Ал қаладағы бірқатар көпқабатты үйдің сыртын "ENRS Қазақстан" компаниясы абаттандырады. Қала әкімі Ерхан Омаров бүгінгі есебінде жаңадан бой көтеріп жатқан "Нұр Ақтөбе" ауданына кеңінен тоқталды. Айтуынша, жаңа ауданда екі мектеп, төрт балабақша, 500 адамға есептелген емхана, 40 гектар аумақта саябақ болады. "Нұр Ақтөбенің" алғашқы тұрғындары осы жылдың желтоқсанында қоныс тойын тойлайды. Ол кезде 645 пәтердің кілті тапсырылады. Ал 16 блок тұрғын үй, бұл - 1 мың 440 пәтер 2013 жылы беріледі. |
Количество показов: 3074
Дата создания: 10.08.2012 21:09:37
